كــــلام
كلام فارغ كلام مليان
كلام مخفى كلام بيبان
كلام بينفع كلام يضر
كلمه بتبنى روح انسان
كلام بيجى كلام بيروح
كلام مقفول كلام مفتوح
كلام يطلع كلام يدخل
يزود فينا ياما جروح
فى كلمه تقولها تمتلكك
فى كلمه تقولها تنساها
نسيتها اكيد هتفتكرك
تروح دايما على هواها
كلمه بسيطه تكبر لك
تخلى الناس بتسهر لك
بموت او هم عم تحلم
فى شر هلاك تدبر لك
كلمه تروح لحد الشمس
تجيب فى دفاها ترجع لك
وكلمه تشد فيك للأمس
تمّوت فيك تجيب اجلك
كلمه تشيل قيود الظلم
وكلمه بتمحى لون الدم
وكلمه تموت الانسان
تصير تخرس بايده الفم
وكلمه تقول معانى الحق
وكلمه تقوم تنام بالصدق
كلمه تجيب لك الاحلام
كلمه بتوصل اللى انشق
كلام وبس دى حياتنا
رد لفعل مش افعال
فاضل كلمه على مماتنا
هتمحى كل شئ اتقال
ليست هناك تعليقات:
إرسال تعليق